Un’annu de lìngua bia

Un’annu de lìngua bia

Un’annu a oi nci funt stètias is eletzionis in Casteddu. Eus partecipau, ma no eus bintu. In medas logus, in su 2017, su mundu cosa nosta, is cumpàngius e is patriotas, no ant nimancu partecipau. Sa chistioni est grai….

In s’istadi de su 2016 eus detzìdiu de andai ainnantis. Sa batallla in Sardìnnia est longa, e sa lìngua est de importu mannu. Eus detzìdiu de traballai, de manera populari, apitzus de sa lìngua.

Sa lìngua, ita spantu mannu. Chi fueddas cun militatis indipendentistas, assessori, consilleris, medas, de dereta e de su PD, indipendentistas e de centru, ti nant ca “bisogna recuperarla”. Apustis no dda studiant, e no faint nudda po issa. E passant is annus, e sa lìngua si-nci morit.

Nosu eus fatu a s’imbressi. Sa cultura est “a fai” is cosas e nosu ndi eus pesau un’iscola. Est stètiu unu traballu grai, grai meda. Atru chi “post” in facebook o “cramadas”. Est unu traballu chi nci bolint istùdiu, tempus e gana.

Nci-dd’eus fata. Custu artìculu serbit po torrai gràtzias a totus is chi nci ant traballau, a totus is studiantis e a nai a totus is chi stimant sa lìngua sarda chi eus detzìdiu de inghitzai unu tretu nou: agiudai-sì! Poita seus pensendi de ndi pesai unu sòtziu, formali.

Cali funt is arresurtaus?

Tres cursus de sardu bàsicu, prus de 60 fèminas e òminis, de calichisiat edadi, chi ant inghitzau a fueddai e studiai su sardu.

Unu cursu de sardu adelantau, cun su maistu mannu Mario Puddu.

Unu cursu de scriidura poetica in sardu, cun Gianni Mascia.

Trinta, cuaranta ciaciarradas, est a nai atòbius aundi personas de importu po sa lìngua e po su movimentu linguisticu ant fueddau de su chi faint e de su chi pensant. Eus cumbidau genti meda, casi totus funt bènnius, calincunu nimancu at arrespustu.

E medas atras cosas….

Teneus una propònnida pòlitica po su mundu cosa nosta. Chi boleus essi “credibili”, e naraus ca su sardu est de importu mannu, tocat a ddu studiai e a ddu imperai.

Ddu naraus a totus is giorronalistas e fèminas e òminis de curtura chi ant votau a Kelledda Murgia, o chi nant chi funt soberanistas. Po bosatrus seus prontus a fai cursus.

Ddu naraus a totus is chi funt in partidus indipendentistas o in organizatzionis indipendenstas. Ddu naraus a is cumpàngias e is cumpàngius de “A Foras”. Pigaus s’impìnniu, de innoi a cabu de un’annu, de fueddais sceti in sardu in is atòbius? Chi ddoi at sa gana de istudiai, si podit fai. Nosu seus prontus a fai cursus e a agiudai.

Ddu naraus a totus is cumpàngias e cumpàngius chi, in Casteddu, nant ca su sardu est de importu, ma scriint a fueddant sèmpiri in italianu. Est a nai Manifesto Sardo, Comitato per la difesa della costituzione, sinistra italiana, rifondazione comunista, CGIL, e atrus puru. Chi no inghitzais unu tretu bolit nai chi seis pighendi in giru.

Ddu naraus a is studiantis, Scida, Link e Unica 2.0. Ma est pòssibili chi si stùdiant dexenas de lìnguas, e sa lìngua de sa terra cosa tua no dda scieis scriri e fueddai? E pensais de connosci unu logu chena fueddai e scriri sa lìngua de cussu logu? No fait po logus chi funt attesu, imaginai-sì po sa Sardìnnia.

No si boleus ponni apitzus de is atrus. Nosu seus un’iscola populari. Nosu seus comenti a bosatrus.

 

Comments

comments

Related Articles

Continuando ad utilizzare il sito, l'utente accetta l'uso di cookie. Maggiori Dettagli

Le impostazioni dei cookie su questo sito sono impostate su "consenti cookies" per offrirti la migliore esperienza possibile di navigazione. Se si continua a utilizzare questo sito web senza cambiare le impostazioni dei cookie o si fa clic su "Accetto" di seguito, allora si acconsente a questo.

Chiudi